GERARDVS ALESIVS

Gerardi prima poemata iam publici iuris facta sunt!
1. “Epigrammatum libellus”, Edition Praesens, Vindobonae MM. (ISBN 3-7069-0064-5);
2. “In tempore irae”, a musico Wolfram Wagner more motettae compositum carmen invenitur in disco compacto, quem CHORAKADEMIE 2002 in Dominicanorum ecclesia urbis Krems recepit. Continet
 Joseph Haydn, “Missa in tempore belli” sive Paukenmesse, et Wolfram Wagner, Motetten
(CD da capo 68.24865)

 

 

Hortule efflorens

Hortule efflorens vario colore
iubila! campique virete flore!
rideas caelum! Glycerae potens vis
   rura revisit.
Tu Venus regina etiam venire
ne recusa omnis properet cohorsque
iam tuorum in quis ego gnavus adsim
   cultor amoris.

 

 

Ad Glyceram

Flos nullus dabit et dabit
arbor nulla avis et nihil
nil solacioli dabit
   nullum denique caelum.
Mors crescit latebris nigra
terrae crescit ab intimis
alas marmoreas movens
   auras evolat altas.
Flos nullus dabit et dabit
arbor nulla avis et nihil
at solacia conferet
   nostrae noctis imago.

Ad Adalbertum W.

Musae dramaticae tu modulos sciens
seu cantare operas est opus Italas
perquam dulcisonas seu gravius canis
   quidquid fert animus, bone
cantator: lacrimis assiduis genas
irrorare soles: pura etenim fides
Susannae periit, quae tibi culta te
   dimisit iuvenis senem.
Et desiderii nunc tibi non modus
stat nec stat ratio: perspicuum quidem est
illam esse egregiam, non mediocribus
   dignam laudibus indolis.
Atqui nunc abiit. Quid tibi si foret
cantanti Orphica vis? quid miserum iuvet
audit cum minime et clausa manent tamen
   duri pectoris ostia?
Sic et Bassarides Threicius canor
nil movit, Geticas qui domuit feras.
cogit tete etiam dura necessitas
     ergo desine deprimi.

 

 

Aestate

Aethera aestivum graviter calentem
nubium fusca inficiunt colore
deficit iam sol, tacet ales, instat
   Iuppiter ater.
Agmina abscedunt apium repente
atque formicae properant timentes.
pallidus messor metuit laborem
   perdere durum.

Nos domum certam petimus trahisque
me manu cara calidum volando
lectulum ad dulcem, numerare et inde
   fulmina gaudes.

Ad Symmachum

Non lectos memoras libros
   et quae non data sunt flammea basia
atque infecta quidem refers
   nec cantata tibi carmina mellea.
In vinis oculi natant.
   voces rauca sonant et lacrimabilis
durum qui moveat virum
   oppresso gemitus pectore solvitur.
Quid te Symmache maceras?
   est quod praeteritum, praeteritum sinas.
num prodest querimonia?
   immo tu potius quidquid habes vide!
Praesto sunt tibi amiculi
   quis noctem volupest ducere cum tuo
magno et ingenio et sale
   quis cordist referas aurea carmina.
Adsis et faveas ioco.
   dulcis vina tibi languida porrigit
Lyde, fallere quam cave:
   paetis luminibus Symmache te vocat.

 

 

De brevitate vitae

”Vita nimis brevis est, natura maligna” queruntur
   ”et spatio exiguo vix bene vita datur.”
Errant: quando oculis altis exceptus amicae
   descendi longa mellifluaque via
dulciter et sic mersus eram latuique profundo
   tum satis est: vixi: praeterea quid agam?

Tempus

Videsne flumen montibus arduis
decurrere alte: rupibus irruit
   et frangitur vastis sua vi
       et rapidum vehemensque fertur
cum deinde apertam planitiem petit
mox lenior fit curriculum et premit
   tum paene sistit deinde rursus
       accelerans pelago adpropinquat.
Et tempus hic stat tum propere volat
loris remissis tum modice ambulat
   durumque: quo felicius fit
       hoc citius properare tendit.
O siste tempus dum Glycera fruor
o numen ingens adnue dexterum
   faveque cultori innocenti
       tempore tuque bono fruaris
puella dulcis plenaque gratiae
occasionem tu arripe fervide
   donec licet meque es potita
       mente tua et rapiente forma.
Consumor igni perpenetrabili
per ossa carporque indomito die
   et luce quae siccat calore
       viscera mi cerebrumque doctum.
Quandoque stabit terminus omnium
rerum mearum tu meriti dabis
   tum membra flammis tu decora
       tristitia cineremque ventis.
At parce fletu desine lacrimis
turpare vultus eximii decus
   scis namque fortuna beatum
       meque fuisse tuum poetam.

 

 

 

 

 

ALANUS VAN DIEVOET

 

 

AD GAIUM LICOPPE,
LATINITATIS VIVAE DEFENSOREM ET PROPAGATOREM.

pepigit  Alanus VAN DIEVOET.

Ars longa est, dicunt medici, sed vita brevis lux,
sic via longa quoque est usque ad Latium redivivum :
tu medicus bene  scis teque ars perlonga iuvabit,
iampridem linguam qui sanes semisepultam,
nec via longa tibi gravis, indefesse viator,
qui multos homines, multas urbesque latino
ore loquens nosti, prae te vexilla latina
gestans  pacifice per terras non bene gratas.
Tuque gregis nostri, patrone et optime ductor,
perge diu nobis constanti mente favere
atque animo forti Latii  defendere linguam,
ne misere pereat quondam regina triumphans.
Perge  etiam calamo docto varioque docere
lectores, carpens passim nova mella  Melissae.
Sic eris usque quod es, fortis, bonus atque fidelis,
fundator solidus, constructor et aedificator,
omnibus attentus, semper quoque firmus amicus,
ni nimis est, etiam cum te pituita molestat !



31/05/01

 

AD STEPHANUM FEYE.
Scholae Novae scholarcham et conditorem.

Pepigit Alanus Divutius Bruxellensis.

Ne pereat veterum doctrina secreta sophorum,
ne sileat  semper magici vox muta Smaragdi,
fundasti ludum quo perpetuentur in aevum,
Hermae ter magni mysteria magna verendi.
Sic nova vita datur prisco trunco moribundo,
sic nova de priscis oritur schola vivida cunis.



21/05/2001

AD THEODORICUM SACRÉ.

pepigit Alanus VAN DIEVOET

Quae te Musa favens, quae te perdocta Camena
edocuere chely sacros componere versus
sermonesque  sacros sacra recitare loquela ?
Potastine puer sacro de fonte caballi,
an cursu aerio te sacris Pegasus alis
portavit sublime ad sacrum Heliconis acumen ?



18/05/2001

 

DOMUS LATINA BRUXELLENSIS.


Pepigit Alanus Van Dievoet.

Hic nova Roma  latet, sed non tacet inter amicos,
hic prisci lente renovatur lingua Latini.
Hic loquitur Gaius, Tulli Ciceronis ad instar,
respondentque omnes puro sermone Quiritum !

Floribus hic Latii carpit nova mella Melissa,
quae sparget longe trans oras oceanosque
qua nova stella micans,  expellet clarius umbras.

Rivulus hic tenuis reddet tibi, Romule,  Thybrim.
Huc recreato orbi redeunt Saturnia regna.


21/04/2001

VER NOVUM ANNI 2001.

pepigit Alanus Van Dievoet.

En crescunt flores hortis, recinuntque volucres,
ver redit in pratis, montibus atque mari,
sed  redeat quoque ver in pectora nostra, repellens
curas letiferas tristitiamque  nigram.


08/04/2001

 

 

IN HONOREM AUGUSTI ANCARANI,
AMICI LIBRORUM.

Pepigit Alanus Van Dievoet.

Tot  tibi sunt libri, quot gaudia mentis, amice,
tot tibi sint semper pectore laetitiae.

Tot tibi sunt libri, quot tritae dulciter horae,
tot tibi sint semper tempora dulciflua.

Hi tibi semper erunt veterum revocatio rerum,
cum fortasse homines plus coluere bonum.

Hi tibi semper erunt, rueret si mundus hiatu,
securus portus dulceque confugium.


04/04/2001

ILLA DIES
pepigit Alanus Van Dievoet Bruxellensis.


Illa dies sit in aeternum celebranda quotannis,
quae videat primum, divina ab origine mundi,
Ditis regna atri, septupla impervia  clave,
sub vernum tempus, vivo spendescere sole.


anno1969

 

 

 

 

 

RADVLFVS LAVALLE

 

 

Rara Pax

             Herman’s Hermits, Anglicus coetus novae undae musicorum, hanc lepidam cantiunculam canebant (c. 1965). Ei mihi, nives nunc capilli mei sunt!
Si vultis, imitationem meam Latinam bono animo legite.

 

There’s a kind of hush

Orbis terrarum

All over the world

dormit in pace;

Tonight,

nox est

All over the world:

mundo universo;

You can hear the sound

concentum audies

Of lovers in love.

invicem amantium.

You know what I mean.

Mentem meam tu scis:

Just the two of us

nos unanimes

And nobody else

in dulci eremo;

In sight;

alma

There’s nobody else

pax in nobis est,

And I’m feelin’ good

studia omittamus

Just holding you tight.

voti compotes.

 

 

So listen very carefully,

Ausculta ergo intentissime,

Get closer now

da mihi basia et

And you will see what I mean…

mentem meam plane capies…

It isn’t a dream.

Somnium hoc non est.

The only sound

Solum hoc audies

that you will hear

in auribus

Is when I whisper

murmurium vocis

In your year: “I love you

quam dico: “Amor, amor,

For ever and ever.”

nunc et in aeternum.”

There’s a kind of hush

Orbis terrarum

All over the world, etc.

dormit in pace, ktl.
 

Winchester Cathedral

Winchester Cathedral
You're bringing me down
You stood and you watched as
My baby left town

You could have done something
But you didn't try
You didn't do nothing
You let her walk by

Now everyone knows just how much I needed that gal
She wouldn't have gone far away
If only you'd started ringing your bell

Winchester Cathedral
You're bringing me down
You stood and you watched as
My baby left town

 

Templum Dianae Ephesiae,
tute interficis me,
tu stas et nos audis...
Et puella evanuit.

Favere potuisti,
sed induruisti cor;
nullam opem dedisti,
mea nympha abiit.

Nunc omnes sciunt
quantum ego
hanc amavissem.
Numquam liquisset
mea brachia,
si solum movisses
summum fastigium.

Templum Dianae Ephesiae,
tute interficis me.
Sed, cave, Erostratum
Furiae ceperunt.

 

 

 

 

MARCO SBARDELLA

 

 

Acrostichis pontificia

      Iesu, Sancte Pater, testis et apostole magne,
      Orbi terrarum dixisti: “Ne timeatis”;
      Ardenter flentes opperti sunt miserique,
      N obis te Dominus donavit pontificem almus.
      Nostrum pastorem. Solatur vox tua solos
      Et fessos omnes divinae pacis amantes;
      S unt morbi tibi nunc curae magnaeque labores.

      Permundi calles incedis nomine Christi,
      Auxilians aegris animis et cordibus ipsis,
      Ut vertant se omnes ad coelum tute laboras
      Laeti cognoscant magnum verum Dei amorem.
      Ut Trias hic servet te multum sancta diuque,
      Sustineat semper tuum iter nunc Virgo Maria.

      Marco Sbardella, 15.07.2002

 

 

 

 

BIBLIOTHECA BODLEINA

 

 

LEGES BIBLIOTHECAE BODLEIANAE ALTA VOCE PRAE LEGENDAE CVSTODIS IVSSV

Do fidem me nullum librum vel instrumentum aliamve quam rem ad bibliothecam pertinentem, vel ibi custodiae causa depositam, aut e bibliotheca sublaturum esse,aut foedaturum deformaturum aliove quo modo laesurum; item neque ignem nec flammam in bibliothecam inlaturum vel in ea accensurum, neque fumo nicotiano aliove quovis ibi usurum; item promitto me omnes leges ad bibliothecam Bodleianam attinentes semper observaturum esse.

(28:03:2002)